شروط برنامج الموزعين ديال إكنو

النسخة ديال 5 أكتوبر 2026

1. شنو هو البرنامج

برنامج الموزعين كيسمح لأي شخص ولا شركة مستقلة يعرّف الزبناء بآلات إكنو ويربح عمولة على كل بيعة توصلات وتخلصات. الموزع وسيط مستقل (apporteur d'affaires) : كيدير العلاقة بين الزبون وإكنو. ماعندوش الحق يوقّع ولا يلتزم باسم إكنو، ولا يقبض الفلوس باسمها، ولا يبدل الأثمنة ولا الآجال ولا الضمانة. البرنامج ماشي عقد شغل، ولا وكالة تجارية، ولا امتياز (franchise). إكنو هي اللي كتبيع، كتوصل، كتعطي الفاتورة بالـICE للزبون، وكتتكلف بالضمانة وخدمة ما بعد البيع.

2. شكون يقدر يدخل

البرنامج مفتوح للبائعين فالسوشيال ميديا، البائعين المستقلين، المحلات، الموزعين والتقنيين. الدخول كيكون بعد موافقة إكنو، اللي تقدر ترفض بلا ما تبرر. التسجيل ماكيحتاجش وضعية ضريبية، ولكن حتى عمولة ماكتتخلص بلا فاتورة فيها ICE (مقاول ذاتي، مساهمة مهنية موحدة، نظام عادي ولا شركة)، مع نسخة من البطاقة الوطنية وRIB باسم الموزع.

3. المستويات والعمولة

كاينين 3 ديال المستويات : موزع، موزع مؤكَّد وشريك جهوي. كتطلع من مستوى لمستوى أوتوماتيكيا حسب المبيعات اللي توصلات وتخلصات. العمولة هي نسبة من الثمن بلا ضريبة اللي فاتورات إكنو للزبون، بلا مصاريف التوصيل. النسب وشروط كل مستوى كيتعطاو للموزع ففضاء الموزع ولا فواتساب. إلا نقصات شي نسبة، ماكتطبقش غير على الطلبات اللي جات من بعد 30 يوم من الإعلان؛ وإلا زادت، كتطبق دغيا. ما كاينش ربح على تسجيل أشخاص آخرين (ماشي تسويق هرمي).

4. الثمن والفاتورة

الثمن هو الثمن ديال إكنو، واحد لجميع الزبناء. غير إكنو اللي كتعطي الدوفي والفاتورة باسم الزبون. الموزع ما يقدرش يعلن ثمن آخر، ولا يوعد بتخفيض، ولا هدية، ولا طريقة أداء ما وافقاتش عليها إكنو كتابيا.

5. شكون الموزع ديال الزبون (الإسناد)

البيعة كتحسب للموزع إلا الزبون تسجل من طرفو قبل الطلب، بوحدة من هاد الطرق : (1) الرابط الشخصي ديالو؛ (2) رسالة واتساب من الزبون فيها الكود ديال الموزع؛ (3) فيشة الزبون اللي كيعمرها الموزع (الاسم، المدينة، الهاتف، الآلة). الزبون كيبقى محسوب للموزع 30 يوم من التسجيل، وتقدر تتجدد مرة وحدة إلا كان تواصل جديد. إلا جوج موزعين طلبو نفس الزبون، كتربح أول فيشة مسجلة بالتاريخ والساعة. الزبناء اللي كانو ديجا متواصلين مع إكنو ماكيدخلوش، إلا بموافقة مسبقة.

6. الطلب والتأكيد

إكنو كتأكد كل طلب مباشرة مع الزبون قبل الإرسال، وتقدر ترفض ولا تلغي طلب (زبون ما كيجاوبش، عنوان ناقص، شك فالتحايل). آجال التوصيل هي اللي كتأكدها إكنو.

7. إمتى كتستاحق العمولة

العمولة ماكتستاحقش حتى تجتمع هاد الشروط كاملين (شرط واقف) : (1) الآلة توصلات؛ (2) الثمن تخلص كامل لإكنو؛ (3) فات أجل التراجع القانوني (7 أيام) بلا تراجع ولا إرجاع. الطلب الملغى، المرفوض عند التوصيل، المرجوع ولا المسترجَع : بلا عمولة. استرجاع جزئي : العمولة كتنقص بنفس النسبة. العمولة اللي تخلصات بالغلط كتنقص من العمولات الجاية.

8. أداء العمولات

العمولات المستحقة كتخلص جوج مرات فالشهر بالتحويل البنكي، مقابل فاتورة الموزع. إكنو كتطبق الاقتطاعات من المنبع اللي كيفرضها القانون (المدونة العامة للضرائب)، بحال 30% على الجزء اللي فات 80 000 درهم فالعام بالنسبة للمقاول الذاتي، و10% بالنسبة للنظام العادي ولا المبسط. التفاصيل ديال كل عمولة (الطلب، الحالة، المبلغ، تاريخ الأداء) كتوصل للموزع مع كل أداء.

9. الرابط، المدة والنشاط

ما كاينش حد أدنى ديال الطلبات. الرابط الشخصي صالح 90 يوم، وكيتجدد إلا كان نشاط (فيشة زبون ولا نشر مطابق على الأقل). إكنو تقدر توقفو فأي وقت.

10. ماشي حصري

البرنامج ماشي حصري : إكنو تقدر تبيع مباشرة وتعيّن موزعين آخرين فكاع المناطق. حماية الزبون كتكون بالفيشة (البند 5). منطقة حصرية ماكتكونش غير لـ«شريك جهوي»، بعقد مكتوب منفصل فيه هدف ومدة.

11. العلامة والكيت ديال الإشهار

الكيت (صور وفيديوهات بلا رقم إكنو، وفيشات تقنية) كيتستعمل غير باش تعرّف بإكنو، وطول مدة البرنامج. إجباري : تكتب «موزع مستقل ديال إكنو» فالصفحة والمنشورات ديالك. ممنوع : (1) تصاوب حساب، صفحة، اسم مستعمل، موقع ولا كروب فيه «إكنو» بلا موافقة كتابية؛ (2) تشري إشهار على الكلمة ولا الاسم «إكنو / IKNO» (Google، Meta)؛ (3) تبدل اللوغو ولا الفيشات التقنية؛ (4) تنشر فالمنصات (Avito، Marketplace…) بلا موافقة؛ (5) تقدم راسك على أنك إكنو ولا خدمة الزبناء ديالها.

12. إشهار صادق

خاص الموزع يقدم الآلات بالصح وبحسن نية. ممنوع : مردودية، قدرة ولا ربح ماشي من الفيشة التقنية ديال إكنو؛ وعد بضمانة غير ضمان إكنو ديال 12 شهر؛ «أرخص ثمن فالمغرب»، تخفيضات كاذبة، «آخر قطعة» كاذبة، آراء ولا شهادات مزورة؛ تحقير المنافسين. خاص المنشورات تبان بلي هي إشهار (القانون 31-08).

13. المعطيات والرسائل

الموزع ما كيتواصل غير مع الناس اللي قبلو. بلا spam، بلا ما تزيد شي رقم فكروب واتساب بلا موافقتو، وكتحيد أي واحد طلب. معطيات الزبناء اللي كيصيفطها لإكنو كتستعمل غير للطلب، التوصيل، الضمانة والعلاقة مع الزبون؛ ما يبيعهاش وما يستعملهاش لشي مورد آخر، وكيحيدها ملي يسالي البرنامج، وكيعلم الزبون بلي المعطيات ديالو مشات لإكنو (القانون 09-08).

14. الضمانة وخدمة ما بعد البيع

إكنو بوحدها كتتكلف بضمان 12 شهر، الإصلاح وخدمة ما بعد البيع، حسب شروط البيع. الموزع كيوجه الزبون لإكنو، وما كيوعدش بتدخل، تبديل ولا أجل فبلاصتها.

15. التكوين والدعم

قبل أول رابط، كاين تكوين قصير (الآلات، الفيشات، القواعد). إكنو كتعطي الكيت، الفيشات التقنية، ومسؤول ديال الموزعين فواتساب.

16. التحايل والعقوبات

ممنوع : الطلب لراسك ولا للعائلة باش تاخد عمولة، طلبات ولا زبناء مزورين، معطيات مختلقة، تحويل زبناء إكنو، قبض فلوس باسم إكنو بلا إذن. العقوبات بالتدرج : تنبيه، توقيف الرابط، إلغاء العمولات المعنية، إقصاء نهائي. العمولات المرتبطة بالتحايل ماكتستاحقش أبدا وتقدر تسترجع.

17. المدة والتوقيف

البرنامج بلا مدة محددة. كل طرف يقدر يوقفو فأي وقت بإشعار 15 يوم. إكنو تقدر توقفو دغيا فحالة خطأ جسيم (تحايل، إشهار كاذب، ضرر للعلامة، spam). العمولات المستحقة قبل التوقيف كتخلص، إلا فحالة تحايل؛ والعمولات اللي فالانتظار كتخلص من بعد التحقق. الموزع كيوقف دغيا استعمال العلامة والكيت.

18. تبديل الشروط

إكنو تقدر تبدل هاد الشروط. التبديلات كيتعلن عليهم ففضاء الموزع وفواتساب 30 يوم قبل ما يبداو، إلا إلا فرضها القانون. تخفيض العمولة عمرو ما كيطبق على الطلبات اللي تسجلات قبل.

19. الضرائب

الموزع كيصرح وكيخلص الضرائب والاشتراكات ديالو بوحدو. إكنو كتطبق الاقتطاعات من المنبع اللي كيفرضها القانون، وكتعطي شهادة الاقتطاع إلا طلبها.

20. القانون والنزاعات

القانون المغربي. كنقلبو على حل ودي لمدة 30 يوم، ومن بعد كتختص المحكمة التجارية بأكادير.